Starfsfólk 

Alma Kristín hóf balletnám sitt í Klassíska listdansskólanum, árið 2000, þá fjögurra ára gömul. Hún útskrifaðist af framhaldsbraut skólans árið 2012. Árið 2016 var danshópurinn FWD Youth Company stofnaður og hefur Alma Kristín verið meðlimur síðan þá. Hún hefur kennt klassískan ballet við skólann síðan árið 2015. Alma Kristín hefur sótt sumarnámskeið erlendis, bæði í Kaupmannahöfn og London. Nú stundar hún nám í hjúkrunarfræði við Háskóla Íslands ásamt því að starfa á hjartadeild Landspítalans.

​

Andrea Urður hóf balletnám sitt við Balletskóla Sigríðar Ármann þegar hún var fjögurra ára gömul. 9 ára færði hún sig yfir í Listdansskóla Íslands og hefur dansað með FWD Youth Company frá árinu 2017. Andrea byrjaði að kenna ballet árið 2014 í Klifinu sem er skapandi setur fyrir ýmis listnámskeið, þar kenndi hún nemendum á aldrinum 3-7 ára. Sumarið 2016 skipulagði Andrea og stjórnaði skapandi námskeiði fyrir börn á aldrinum 5- 12 ára þar sem lögð var mikil áhersla á skapandi dans ásamt öðrum listgreinum. Haustið 2019 byrjaði Andrea að kenna í forskólanum hjá Ballettskóla Guðbjargar Björgvins, núna Óskandi, og í grunnnáminu hjá Klassíska listdansskólanum. Andrea Urður er einnig nemi í lögfræði við Háskóla Íslands.

Anna Kolfinna Kuran er sjálfstætt starfandi dansari og danshöfundur. Hún útskrifaðist með BA- gráðu af samtímadansbraut Listaháskóla Íslands árið 2013. Eftir útskrift hefur hún unnið að ýmsum verkefnum í samstarfi við aðra eða að eigin verkefnum bæði sem höfundur og flytjandi. Verk hennar taka á sig ólíkar myndir þar sem flæði milli miðla, greina og aðferða er greinilegt, megin áherslan liggur þó í því sjónræna og líkamlega. Gegnumgangandi þemu í verkum hennar eru að rannsaka viðfangsefni sem við koma líkama konunnar og samtíma femínisma. Anna Kolfinna er meðal stofnenda sviðslistahópanna Dætur og Kraftverk sem unnið hafa að ýmsum sýningum síðustu ár. Undanfarin þrjú ár hefur Anna Kolfinna einblínt á persónulegt verkefni sem ber titilinn Konulandslag þar sem hún rannsakar tengsl milli kyns og rýmis. Auk þessa verkefnis hefur Anna Kolfinna einnig fengist við samstarfsverkefni við aðra listamenn, þar á meðal kom hún fram sem flytjandi í verkinu Atómsstjarna sem sýnt var í Ásmundarsal á Listahátíð 2018 og samdi verkið Allar mínar systur fyrir ungmennadansflokkinn Forward Youth Company sem sýnt var á hátíðinni Únglingurinn í Hafnarhúsinu 2018. Vorið 2017 lauk hún fræðilegu meistaranámi við NYU í performance fræðum (e. performance studies).

Þetta er Bjartey. Hún er 19 ára gömul og hefur æft dans frá 5 ára aldri. Þá byrjaði hún í Klassíska listdansskólanum og útskrifaðist þaðan árið 2016. Haustið eftir útskrift fór hún ekki langt út fyrir veggi skólans en þá byrjaði hún í FWD sem er ungmennadansflokkur sem starfar einnig innan Dansgarðsins. Hún hefur verið þar síðan en hún er einmitt ein af þeim sem stofnuðu hópinn í upphafi. Hún stundar nú nám á samtímadansbraut við Listaháskóla Íslands ásamt því að vera í FWD. Hún sér um kennslu í grunndeild og kennir einnig táskó á framhaldsbraut við Klassíska listdansskólan. Hún hefur því aldei yfirgefið skólann síðan hún kom þangað fyrst 5 ára gömul.

Díana Rut er sjálfstætt starfandi dansari og danshöfundur. Hún útskrifaðist frá Listaháskóla Íslands árið 2015 af sviðlistabraut með áherslu á samtímadans. Frá útskrift hefur hún unnið við mjög fjölbreytt verkefni, allt frá því að vera danshöfundur tónlistarmyndbanda til þess að koma fram í þverfaglegum sviðslistasýningum og danssýningum. Meðal tónlistarmyndbandaþar sem Díana hefur verið danshöfundur eru Samaris („Wanted 2 say“) og Seven Lions Creation featuring Vök. Samhliða hefur hún kennt samtímadans í Listaháskóla Íslands, Klassíska listdansskólanum og Listdansskóla Íslands. Díana starfaði einnig um tíma sem yfirþjálfari í bardagaíþróttafélaginu Mjölni þar sem hún sá um kennslu í hreyfiflæði. Á síðasta ári festi Díana Rut kaup á stórum sveitabæ á Suður-Sjálandi í Danmörku ásamt manni sínum Erlendi sem er klíniskur sálfræðingur, þar ætla þau að sameina sérsvið sín til að skaparannsóknarvettvang fyrir listir, geðrækt og hreyfingu.

Guðrún Svava Kristinsdóttir er útskrifaður dansari og danskennari frá the Martha Graham School of Contemporary dance í New York borg, hún er ein af fáum kennurum með þessi réttindi í Evrópu. Guðrún Svava var einnig dansari með Graham II, nemendadansflokks Martha Graham Dance Company sem hún þjálfaði einnig með.
Guðrún Svava er einnig yogakennari og Pilateskennari og leggur sérstaka áherslu á góða og rétta beitingu líkamans út frá líkamsbyggingu hvers og eins, en hún hefur sótt fjöldamörg námskeið í hvernig á að fyrirbyggja og endurhæfa meiðsli með dansara í huga.
Guðrún Svava hefur undanfarin ár kennt og byggt upp sín eigin námskeið við Listaháskóla Íslands í leikaradeild, dansdeild og tónlistardeild, og samdi meðal annars sérstakt námskeið í líffærafræði fyrir dansara sem hún hefur kennt fyrir alla árganga frá 2013.
Guðrún Svava er einnig verkfræðingur að mennt og er nýlega útskrifuð frá Cornell University í New York með dual MS í Information Science og Information Systems.
Vegna fjölbreytilegrar reynslu sinnar innan tækni- og listageirans leggur hún mikið uppúr því á  sínum námskeiðum að hver og einn einstaklingur fái að njóta sín andlega, líkamlega og vitsmunalega.
Guðrún Svava leggur mikið uppúr tæknilegri þróun dansara og nýtir í því samhengi áralangra reynslu frá New York. Hún leggur einnig áherslu á takt- og tónlistarnæmni nemenda sinna í bland við framkomu og leikræna tjáningu danssins. 

Gígja Jónsdóttir er danshöfundur, danskennari og myndlistarkona. Hún útskrifaðist af samtímadansbraut Listaháskóla Íslands árið 2013, stundaði nám við Myndlistaskólann í Reykjavík 2015-2016 og lauk meistaranámi í myndlist frá San Francisco Art Institute vorið 2018 þar sem hún einbeitti sér að gjörninga- og videólist. Gígja hefur tekið þátt í
fjölda sýninga hérlendis og sýnt verk sín á Reykjavík Dance Festival, LungA listahátíð, Act Alone, í Mengi, Tjarnarbíói, Harbinger gallery, Listasafni Reykjavíkur, Midpunkt o.fl. Samstarfssýning hennar og Guðrúnar Selmu Sigurjónsdóttur, A Guide to the Perfect Human var tilnefnd til Grímuverðlauna sem Sproti ársins árið 2017. Þátttökusýning hennar WikiHow to Start a Punk Band sem var frumsýnd í Mengi árið 2017 hefur þróast sem pönknámskeið sem Gígja hefur haldið fyrir unglinga, ungar konur, eldri borgara og á næstunni, börn. Gígja hefur kennt nútímadans, klassískan ballett, spuna, skapandi ferli og gjörninga fyrir mismunandi aldurshópa, frá 6 ára upp í fullorðna. Gígja hefur kennt í Dansgarðinn, í Óskandi og Dans fyrir alla, Leynileikhúsinu, og í Listaháskóla Íslands.

Hildur Björk hóf störf hjá Klassíska listdansskólanum árið 2009 og hefur aðallega verið með táskókennslu ásamt því að kenna klassískan ballet. Hildur hefur í gegnum tíðina kennt flestöllum aldurshópum. Hún hefur verið að kenna nemendum sem eru að taka sín fyrstu skref á táskóm og þeim sem eru lengra komnir. Hildur Björk er fyrrum nemandi Klassíska listdansskólans og útskrifaðist þaðan árið 2009. Árið 2010 tók hún þátt í balletsýningu í London með National Youth Ballet. Hildur Björk hefur kennt ballet samhliða háskólanámi og vinnu í gegnum árin. Hún hefur lokið B.Sc. í Viðskiptafræði frá Háskólanum í Reykjavík og M.A. í Náms- og starfsráðgjöf frá Háskóla Íslands. Hildur Björk hefur unun af því að kenna og nýtur þess að sjá framfarir nemenda sinna.

Inga Maren Rúnarsdóttir er dansari og danshöfundur. Hún hefur unnið hjá Íslenska dansflokknum frá 2011 og með öðrum danshöfundum á Íslandi og erlendis. Hún hlaut BA gráðu frá London Contemporary Dance School, er með kennsluréttindi frá David Zambrano auk þess sem hún er menntaður yoga kennari. Inga Maren sýndi nýlega sólóverkið ÆVI og barnaverkið Dagdrauma.

Ólöf G. Söebech stundaði nám við klassíska Listdansskólann og síðar við Codarts Rotterdam (þá Rotterdamse Dansacademie) á danskennarabraut. Hún lauk einnig meistaragráðu í umhverfisfræðum við Vrije Universiteit Brussel. Hún býr yfir fjölbreyttri reynslu hvað varðar menntun, þekkingu og hæfni sem spannar allt frá sviðslistum, kennslu og verkefnastjórn til rannsókna innan háskólasamfélagsins á sviði evrópskrar umhverfisstefnu. Hún starfaði meðal annars sem verkefna og æfingastjóri hjá Íslenska dansflokknum 2004-2006. Í dag starfar hún við Vrije Universiteit Brussel. Ólöf kenndi ballet og nútímadans við KLS frá 1995 til 2005 og hefur verið viðriðin skólann frá því að hann var nýstofnaður. 

Sæunn stundaði nám við Listdansskóla Íslands, lauk stúdentsprófi frá Konunglega Sænska Ballettskólann og útskrifaðist síðan frá Hungarian Dance Academy með BA gráðu í klassískum ballet árið 2010.Sæunn dansaði fyrir Hungarian National Ballet, Dortmund Theater og Peter Schaufuss Balleten. Þar dansaði hún í fjölda verka, m.a. La Bayadère (Petipa), Sleeping Beauty, Nutcracker, Swan Lake, Michael I’m bad, Romeo and Juliet, The King, Manden der ønskede sig en havudsigt (Schaufuss), In the Middle Somewhat Elevated (William Forsythe), Jewels (George Balanchine) og Hamlet (Xin Peng Wang).Á árunum 2011 til 2016 kenndi Sæunn við Listdansskóla Íslands og Klassíska Listdansskólann. Þar kenndi hún nemendum frá 6. stigi og framhaldsbraut, en sáeinnig um uppsetningu sýninga (Klassíski Listdansskólinn), undirbúning fyrir sólókeppnir, auk einkatíma.Frá árinu 2018 hefur Sæunn starfað sem barre- og ballettkennari í Luxemborg. Á þeim tíma lauk hún Barre-réttindum frá Barreworks London (2019) og 200 tíma jógakennaranámi (2020).

Þorbjörg byrjaði að stunda ballett í ballettskóla Sigríðar Ármann. Leiðin lá síðan í Listdansskóla Íslands þar sem hún var í sjö ár og útskrifaðist af grunnskóladeild árið 2018. Henni bauðst síðan þriggja ára skólavist í San Francisco Ballet School. Hún hefur farið á margvísleg sumarnámskeið um ævina líkt og í París, London, Englandi og Bandaríkjunum.